打吡大賽舉行日期越來越近，3月15日就上演，暫時最來勢洶洶當然係經典一哩賽盟主「美麗大師」，佢篤定同最佳拍檔郭能問鼎呢項殊榮。至於灰色神獸「和順超影」，跑落似係中短途馬多啲，本月15號1800米香港經典盃居然冇報名，所以2000米打吡係咪一定跑，仍係未知之數。
其他焦點馬方面，韋達有內地富豪潘蘇通愛駒「大印銀紙」及鞋王le saunda老闆李子彬嘅「直震撼」可揀，搞到佢好頭痛，據知韋達仲未決定騎邊隻。咁又難怪，經典一哩賽季軍「大印銀紙」無疑質素深不可測，但佢同「和順超影」有啲相似，暫時冇長途馬嘅影子，相反「直震撼」跑2000米肯定冇問題，真係魚與熊掌，唔知點算。
至於雷神莫雷拉，頭痕情況媲美韋達，今屆打吡佢可以騎「精彩鬥士」、「醒目名駒」及「酷男」，三揀一起碼要推走兩駒，雷神回應到這一刻為止，仍未揀定打吡座騎，仲話好頭痛。暫時呢三駒中，普羅馬迷一般認為「精彩鬥士」實力最強，而且來港前兩戰2000米全勝，路程最有根據，唔知雷神會唔會考慮呢一點呢？