樓價咁鬼貴，所以啱啱上月先截止申請嘅新居屋，幾乎全城搶購，房屋署總共收到近十三萬份申請表，要逐一睇吓啲申請表喺咪合資格，再寄信通知番申請人，真喺做死班房署職員，呻兩句都好正常，但懷疑有個職員因此而惹禍。
#fb相有申請人地址
噚日就有人同費清投訴，話喺facebook見到有懷疑房署職員洩露居屋申請人嘅名同地址。費清睇過，見到嗰個疑似房署職員上載咗張相，張相見到成叠印有房委會標誌嘅信封，其中一封準備寄出嘅信，仲好清楚睇到收件人姓名同地址（圖），疑似職員仲呻咗一句「食飯時間都要努力」。
費清都明白要處理咁大量嘅居屋申請表好辛苦，喺自己個面書呻吓都係人之常情（利申，費清都呻唔少），但如果洩露咗其他人嘅個人資料，唔係好啱囉。
房署回覆話，未能夠確認嗰位fb用戶係咪房署職員，或喺咪處理緊居屋申請；房署了解緊呢件事，又話如果真確定為涉事房署職員，就會按既定程序採取適當跟進，包括考慮採取紀律行動。根據房屋署守則，房屋署人員收集、運用、處理、儲存同轉移個人資料時，要確保個人資料不會被非法使用及披露。
費清 ＃要生計，也要生活 ＃毋忘初衷