話咁快又農曆新年，八方先同大家拜個早年，新一年大吉「羊」！八方冇寫錯字㗎，事關噚日去咗中大睇賀歲文物展，聽中大藝術系嘅博士生詹鎮鵬講，「羊」因為同「祥」諧音，古時民間好興新正頭以「大吉羊」去祝福其他人㗎！
中大今次迎羊文物展，由文物館、藝術系同中文系合辦，除咗展出四十幾件由春秋戰國至清代嘅文物，好似書畫、陶瓷、玉石、金飾等精品，亦有由中文系撰寫嘅說文解字展板，教大家有關羊嘅漢字同埋成語典故。
羊代表仁德勇氣孝義
據詹鎮鵬講，展覽中以漢代嘅「灰陶羊形燈」同清代畫家任伯年嘅《三陽啟泰圖》最有睇頭。前者「羊形燈」未必好罕有，但傳世以青銅較多，以灰陶造成因易爛，好難流傳到今日。至於《三陽啟泰圖》就畫咗山羊同綿羊，畫家用唔同嘅筆法去表現羊毛嘅觸感，如乾墨畫山羊、濕墨畫綿羊，又取「陽」同「羊」嘅諧音起名，討個吉利咁話。
中大中文系教授何志華都有到場，話歷代中以漢代最推崇羊，好似西漢思想家董仲舒喺《春秋繁露》入面，大讚羊有三種美德，分別係有角但唔主動攻擊，有仁德；被捉被殺唔會哭哭啼啼，有勇氣；羊BB每次飲奶都向羊媽媽下跪，有孝義。總之，羊係好吉利嘅動物，八方都祝大家來年喜氣洋洋啦！
「喜氣洋洋──中國藝術與文化中的羊」展覽
日期：即日起至4月26日
時間：周一至六上午10時至
下午5時；周日下午1時至5時
（逢周四、2月18至22日農曆新年
假期及4月3至7日復活節假期休館）
地點：中文大學校園本部文物館展覽廳
查詢電話：3943 7416
入場費用：免費入場
資料來源：中文大學
李八方
mailto:[email protected]