農曆年假就快到，政府、立法會都放假，政圈中人都可以休息吓、拜吓年，又或者約吓親朋戚友打番四圈。不過，對部份泛民中人嚟講，花生友相信佢哋呢個農曆年放假都會放到心掛掛，因為佢哋要搞何俊仁辭職公投嗰份「說貼」、仲要計掂成個公投要使幾多錢，因為最遲放完年假都要交貨。
話說呢壇公投由民主黨同民間合作，雙方都要交個人出嚟做負責人，一齊搞前期工作，民間團體就由民陣召集人陳倩瑩負責，民主黨就由單仲偕檧籌。咁前期工作，查實要做啲乜？花生友八過，原來首先要計掂條數，因為超級區議會選舉要使嘅錢唔少，同時仲要預計，建制派或會搵人參選，𠵱家初步咁計，成個公投隨時要用六百萬，就算政府喺選舉經費度回番二百萬，都仲要四百萬，呢條數係咪各泛民政黨、政團同意，肯一齊科水？定係到時要搞籌款呢？由於仲未知，所以要盡快有條實數出嚟，一齊傾掂佢。
除咗錢要傾，搞公投有乜目標、有乜理念、點樣分工、點定輸贏都要傾清楚。民陣嘅陳倩瑩就係負責搞呢類嘢，包括寫份畀各團體嘅公投說貼、搞份公投工作備忘錄，聽講初步做法都係參考番二○一○年，公民黨同社民連就五區公投嘅做法，當然就梗係要有加加減減，話晒今次多咗好多組織參與，咁你話係咪放農曆年假都唔慌安樂？
花生友