有傳財政預算案打算削減公屋免租一個月嘅派糖措施，公屋戶梗係唔想啦。噚日工聯會一年一度嘅長者團年宴，全場五百位長者出席，首場嘉賓係特首梁振英同勞工及福利局長張建宗。
敬酒期間，唔少長者都要求CY保留公屋免租，陪足CY全程嘅陳婉嫻同黃國健KK引述CY同啲長者講：「呢個要等財政司公佈喎。」而唔少長者席間亦要求加醫療券金額同保留生果金、綜援出雙糧等，相信CY都聽清楚，工聯會對預算案嘅叫價。
KK噚日致辭時話今年馬年「野馬難馴」，好多波動，希望來年羊年「馴番啲」。唔知KK記唔記得，梁振英係屬馬嘅呢？驚唔驚有人話佢含沙射影呢？但KK呢番話，無損CY心情，不單負責頒發心形金牌畀全場年紀最大嘅何婆婆，仲同學生義工合照。