大型地產代理行呢兩個星期輪住搞周年晚宴，噚日輪到美聯（1200）喺會展筵開超過一百八十席，各大發展商嘅樓神都畀面出席，包括長實（001）趙國雄、新地（016）雷霆、恒地（012）林達民，英皇老闆楊受成直情帶埋孺仔楊政龍同董事張炳強一齊到。
晚宴主題係「今夜星光燦爛」，美聯老闆黃建業同嘉賓全部都着得十分四正。舊年底升正做董事總經理嘅美聯太子女黃靜怡，噚晚嘅打扮算係簡單，只係戴上一對閃閃耳環同戒指，一襲紫色長裙。
佢話條裙係喺一間本地設計師嘅時裝店度買，貪佢剪裁貼身，加上舊年着得太多黑色衫，今年想添啲色彩，所以揀呢隻色。佢仲話好彩舊年做多咗嘢，加埋運動，瘦到五磅，先着到呢條裙。