噚日朝早一開面書，發現全版都係小鳳姐首〈飲勝〉，人人都喺度「熱烈地彈琴熱烈地唱」。費清一問，原來有人影到喜記銅鑼灣分店落閘執笠。
＃實為相鄰餐廳結業
講到喺佔領行動入面人氣急升嘅，除咗學聯五子之外，仲有喜記避風塘炒辣蟹嘅老闆廖偉文。呢位咁出位嘅老闆因為「反佔中」，喺銅鑼灣佔領區講咗句金句「邊有錢啊你老母」，又被指攬實女佔領者大髀唔放涉嫌非禮，得到廣大網民齊心「力撐」， Call齊親戚朋友發起罷食，一度聲稱蝕咗八十萬。
但費清本住「有圖都可以冇真相」嘅精神，親自去到現場走一趟，發現執笠嘅只係旁邊一間餐廳。
由於喜記分店位於地庫，地面嗰層得個門口位，仲要俾間越南餐廳相連嘅舖位夾住，咁啱呢間越南餐廳早排結業，近日掛上招租牌，好衰唔衰影相嘅網民又撞正喜記休息落閘，一個美麗嘅誤會就咁發生咗。
計費清話，俾網民誤解佢執笠都情有可原嘅，皆因老闆之前成日話佔領搞到佢間餐廳生意唔好嘛。
不過咁，為咗班打工仔梗係唔想喜記真係執笠啦。
費清 ＃要生計，也要生活 ＃毋忘初衷