花生友早前講過，大家可以買定花生等睇今年區議會選舉，事關佔領運動後嘅首場大戰，唔少選區都會上演好戲。而上屆開始被建制派全面攻陷壟斷嘅灣仔區，成為泛民今屆重點戰區，花生友聽聞，泛民希望將灣仔區交畀雨傘族集中火力強攻，以令該區成為今年區選全城焦點。
據知有泛民中人已經喺內部提出呢個構想，原因係灣仔區幅員喺十八區中較細、區議員數目亦偏低，而喺灣仔區議會中，家陣泛民議員「一個都冇」，因此令泛民唔多想搵人挑戰呢區，反而如果有新人打住「光復灣仔區」旗幟，未必唔可能。
有泛民中人話喎，灣仔區全面染紅，傳統泛民政黨投放資源強攻呢一區，可謂「嘥心機、捱眼瞓」，既然泛民政黨已棄守，不如試吓由雨傘族嘅新星落區試攻，最理想係喺所有灣仔選區派人同建制派「隻揪隻」，或者「行孖beat」集中喺某幾個灣仔選區，以便令灣仔區成為傳媒焦點，但呢個建議尚停留口水階段。
建制派議員冷笑
有灣仔區建制派議員一聽到呢個建議，來一個冷笑。
因為灣仔區不單止係老區，而且係富貴一族先住得起，年輕人選民比例唔高，加上上屆投票率亦係全港最低，要喺灣仔區勝出真係唔易。不過，若然雨傘族集中火力強攻一區，有建制派區議員認為唔係冇可能，但肯定嘅係，唔能夠顛覆呢個早已深紅嘅選區。
花生友