來自英國嘅白立方（White Cube）畫廊喺香港開幕近三年，今日起首次展出亞洲藝術家嘅作品，呈獻兩位內地年輕當代藝術家蔣志、石青嘅畫作、攝影、裝置藝術品同短片。
其中展品包括長近十分鐘、名為《0.7%的鹽》嘅投影短片，由鍾欣潼一人擔綱，全程用大頭影住阿嬌由微笑到哭泣（圖），負責拍攝短片嘅藝術家蔣志話，短片攝於阿嬌捲入涉嫌裸照風波翌年。佢話當時大家對阿嬌公開哭泣賦予太多意義，人人都用自己嘅眼光去睇件事、估佢點解要喊，所以想透過藝術短片令外界摒棄成見，用無添加眼光睇住阿嬌由笑到哭。短片拍咗幾次就搞掂，相信阿嬌嘅粉絲一定鍾意。由於人類嘅眼淚有0.7%係鹽份，所以取名 《0.7%的鹽》。
石青則展出以園藝做主題嘅裝置藝術品，令畫廊其中一角化身小花園。市民可以今日起逢周二至六、朝十一晚七，到中環干諾道中50號白立方畫廊細味。