阿里巴巴創辦人馬雲近日嘅見報率絕對唔會少得過特首梁振英，噚日佢本人稍作休息，但旗下公司繼續有新聞，剛剛引入趙薇夫婦做第二大股東嘅阿里影業（1060）同深圳廣播電影電視集團簽咗份協議，投資電商電視劇項目。
阿里影業拍電視劇唔係新鮮事，比較有睇頭係電商電視劇，乜嘢叫做電商電視劇？據阿里影業講，係喺傳統電視劇製作模式嘅基礎上，諗吓點樣加入電商嘅產業鏈，配合劇集出街時宣傳同銷售電商產品。
即係點？即係好似王維基旗下港視（1137）咁，播劇嘅同時，畀機會觀眾買嘢囉。
大家試諗吓，你睇劇嗰陣，見到女主角拎住個手袋好靚，就即刻有個手袋嘅連結彈咗出嚟，觀眾可以直接上淘寶度買，睇劇買嘢同一個平台搞掂晒。內地人習慣網購，呢招喺內地會唔會比較行得通呢？拭目以待。