經民聯張華峰噚日現身立法會工務小組特別會議，解釋點解要求後補加入。人數佔多嘅泛民追問佢唔少問題，民建聯陳鑑林抵唔住頸幫拖，鬧泛民點解當張華峰係犯咁嚟審。
公民黨毛孟靜聽到後，隔空同陳鑑林話喎，自己向張華峰問問題嗰陣不知幾「溫柔熨貼」、張華峰又答得「溫柔熨貼」，直情係「完全冇火藥嘅，都唔知幾sweet」。呢番調情sweet論，唔只張華峰忍唔住笑，民建聯譚耀宗直情插嘴話覺得打冷震。坐喺不遠處、病到把聲未好番嘅陳偉業，更加咳到打斷Miss Mo發言，要小組主席梁家傑解圍：「陳偉業議員可能需要冷靜吓。」最終張華峰以四票贊成、三票反對下成功入組。