周凱旋（Solina）日前見傳媒冇現真身，只係用維港投資有份嘅軟件Zoom進行視象會議。據聞Solina當時身處家中，畫面除咗見到佢嘅芳容，佢背後仲有一個裝滿中英文書嘅木製書櫃，Solina確係一位愛書之人。可惜距離太遠，華華實在冇辦法睇清楚佢書櫃裏有乜書，希望Solina將來有機會可以跟大家分享佢嘅藏書喇。
講過算數 安排見Skype創辦人
周凱旋（Solina）呢次現身唔再講社會大事，而係兌現承諾，安排以色列trip嘅得獎學生，同Skype創辦人之一Taavet Hinrikus會面，教佢哋點搞「P2P轉賬服務」。
Taavet讚班學生嘅idea夠好，同自己新公司TransferWise好相似，仲講笑叫佢哋快手啲搞，因為佢都準備好，進軍亞洲市場。
全程會談大概一個鐘，喺Solina打骰嘅維港投資寫字樓進行。班學生表現非常積極，問咗唔少有關法律同創業嘅問題，其中來自理大嘅蔡啟銘仲俾Solina點名讚賞，應承幫佢安排實習機會㖭呀。