冬季轉會窗最後一日，可能各位球迷同我求大俠一樣，不時就click上網留意有邊單大交易會喺重要關頭誕生，突然呢個時候喺各大新聞網站，都彈出伊度奧個名。咦，呢位喀麥隆前鋒，唔係上周二已經由愛華頓轉咗去森多利亞咩？原來呢位麻煩友周一因為唔滿意教練米赫洛域加操，嬲爆咁私自揸車走咗，即刻傳出佢威脅喺轉會六日後再走人嘅消息。
話說因為森多利亞喺周日場意甲大敗畀拖連奴1:5，米赫洛域賽後狠批球隊表現，仲安排周一要加操作為懲戒，上晝操完下晝再操。場波下半場先首次幫森多披甲嘅伊度奧，返到訓練基地後先知當日要操兩課，當然好唔高興，結果有傳佢同米赫洛域喺訓練場吵完大鑊後，就好有性格咁私自揸車離開咗，返番自己喺米蘭嘅屋企。
米赫洛域鬧爆唔尊重
最搞笑係球會知情人士透露，話伊度奧走嗰陣，球會有派人去追佢返嚟，但結果係：追唔到！我求大俠翻查資料，呢位老將一向跑車多，Bugatti、林寶堅尼同法拉利乜都有，雖然唔知佢去練波揸邊架，但佢手車一定有番咁上下，加埋架車本身性能咁好，難怪球會職員追唔到啦！
米赫洛域接受訪問時，鬧爆佢唔尊重，但可能球會都唔想搞大件事，隨後就話伊度奧以私人原因為理由缺席今次操練，而佢亦喺周二乖乖哋返番訓練場，睇嚟已經同米赫洛域傾掂數。伊度奧之前威脅話轉會窗閂前走人，其實就根本走唔到，因為佢今季已經代表咗愛華頓同森多利亞出賽；根據國際足協條例，唔可以再代表第三間球會出場，唔係嘅話就好似賓艾化咁，簽完尼斯都冇得踢。
雖然事件告一段落，但非洲人一向麻煩多多，好似熱刺嘅艾迪巴約都係，一唔高興就搞罷踢，影響埋球隊士氣。伊度奧既然有前科，二○一一年就試過因獎金問題，帶埋班喀麥隆隊友罷踢國際賽（見附表），可能過多幾日又有新搞作，大家記住唔好眨眼！
識睇，一定係睇足英台【英波Live】：
http://soccer.appledaily.com
http://bit.ly/engballlive