冬季轉會窗，買賣匆忙，好壞難料，幸大數據年代，球員場上係好係壞，透過分析，一目了然。入到隻數據怪獸，起碼唔打得都睇得。
英超冬簽入貨最貴三人，落在三強手上，依次序係要追分嘅曼城，撬走史雲斯王牌、二零一四年入波最多嘅英超球員韋菲特邦尼；跟住係車仔購入去年世界盃決賽周，與德國控中卻奧斯同以四次助攻，並列首位嘅哥倫比亞右中場古達度；然後係阿仙奴，購入呢半季喺西甲截擊次數躋身三甲，高達六十六次嘅中堅基比爾包列斯達。呢三位南美同非洲人，全部當打，踢到本月重開嘅歐聯，睇埋造型外貌，唔打得都「嚇」得吓。
以為預測球賽賽果，要靠實淨嘅數據推敲；原來六十五歲嘅阿仙奴波士雲格（圖），冬簽巴西人包列斯達，都係迷上數據。阿仙奴嘅球探系統大約有十人，出名嘅有該隊前法國中場基文迪、前年年尾，筆者去英國列斯聯睇波，仲見到佢教波，之後炒咗嘅光頭領隊麥達莫。各地球探有好嘢上報，雲老心郁，就會再派另一球探去畀多個建議，先有機會拍板。不過今次簽入未曾代表過巴西國家隊嘅包列斯達，雲格大爆係靠已經花咗成二百萬鎊服務費嘅美國數據公司，StatDNA。
睇番StatDNA個網頁，除咗sell每場波賽後用十至二十小時作全面分析之外，落場球員嘅動態都一目了然；唔單係計助攻射門攔截截擊咁簡單，連呢類數據有冇壓力下造出等等都會詳列，仲會為用家推介各地數據卓越嘅球員。包列斯達去咗高水平嘅西甲，踢咗維拉利爾只係一年多，連英文單字都唔識多個，睇得出呢次過英國搵食幾突然；其實兵工廠自從哥斯尼復出，梅迪薩卡即刻定番，兩人今季合作十一次有六次不失球；相反冇咗任何一人，十二場波，球隊只有兩次不失。今次出手，一來包列斯達近績幾省鏡，而且千零萬鎊貨仔，係雲老標準入貨價；但包兄嚟到英超適唔適應，數據話唔到畀你知。
車仔摩帥都係買個保險。連續兩年冬簽，量入為出，都錄得淨回報，厲害！有韋利安，點解要多個只係踢意甲嘅古達度？同雲老借走普多斯基去國米一樣，唔鍾意一啲患世界盃捧盃後遺症嘅德國兵。舒賀爾尼疏於防守，加埋送走上年冬簽嘅埃及兵穆罕默德沙拿，等價就可以免費換到、成條右路打晒嘅氣袋古達度加盟。睇番摩帥近年為車仔、國米及皇馬共五次封王聯賽，只有09/10球季為國米冧莊贏聯賽最驚險，只險勝羅馬兩分；其餘四次都大勝亞軍八至十分，如今只領先二哥曼城五分，曼聯表現持續一般照贏、阿仙奴穩番，利記又有史杜列治復出，摩老唔出手點會心安？
睇番摩帥上周鬥曼城主場照死守，就知車仔下半季不求精采，中場盡用跑狗戰術，志切重奪聯賽錦標。球迷話悶，佢連記者會都唔開費事回應，保住優勢，保住飯碗最緊要。
文：波神