香港大學噚日公佈二○一四年傑出教學獎，四位得主之一，其中一位係日日陪你搭港鐵嘅車廂廣播甜美女聲陳如茵。港大下月三十日會舉行頒獎禮，未見過陳如茵嘅港大師生，屆時可以一睹呢把甜美女聲嘅廬山真面目。
陳如茵現職港大教育學院英國語文部教授，近日網上熱傳佢當年曾經接受英文報章報道，話自己原來唔鍾意搭港鐵聽到自己把聲，反而鍾意搭巴士多啲。但𠵱家西港島綫直通港大，陳教授唔知會唔會改變呢個習慣呢？
其餘得獎教授包括牙醫學院臨床副教授Dr. Michael G. Botelhoz、港大社工及社會行政學系副教授周燕雯同港大文學院應用英語中心高級講師Miranda G. Legg。