史篤城後衞賀夫早前因於Twitter回應一個專post性感照片、畀人估相中人性別嘅網站（簡稱：鹹網；技術層面上稱：「牽涉性別歧視的鹹網」），結果要喊咁口認錯，仲被英足總罰停賽兩場兼罰款近二十萬港元！罰款額仲可比亞視拖糧同嚴重虐畜。有球迷可能同小弟有同樣想法：「手痕回吓post，使唔使咁大件事？」喺英國做足球員就係咁，卓雲伊雲斯（圖）更因衰鹹濕，分分鐘要乞食。
當然，𠵱位前威爾斯國腳鹹濕到犯強姦罪，嚴重得多。但在兩年多牢獄生涯後，佢嘗試重返球會錫菲聯，仍遭十五萬人聯署抗議而告吹；馬耳他有球會向佢招手，卻因其案底不獲批准於外地工作；淪落至欲以四百鎊周薪踢英甲球會奧咸，埋門一腳亦因球會怕贊助商反對而打退堂鼓。這案件在英引發激烈討論：為何嚴重罪犯即使接受了懲罰，也不能再做球員？這樣將釋囚排除於社會之外是好的做法嗎？
可能因卓雲伊雲斯仍申請上訴，被認為無意悔改吧；但關鍵仍是其職業：足球員，這在英國並不普通的職業。在英國甚至歐洲，足球員與一般職業不同，是會有成千上萬觀眾睇住你「開工」；如夠名氣，更會有無數小童、學生模仿其動作、言行，成為普羅大眾的榜樣。故此足球員應有比普通人高的道德標準。成名的代價，就是在鹹網回個post要罰二十萬囉！
方栢翹
now足球評述員