隆成（1225）插到落一年底，淨現金係家陣市值兩倍，喺潛力勁厚嘅醫療產品瓣數發力之前，殘價已經有得諗。
隆成原先主打嬰幼兒用品，但因為競爭太大兼市場放緩，上年中決定出售呢瓣業務，套現9.3億元。又計埋隆成同期揸現金兩億元，扣除埋呢次出售派送每股0.3元特別股息，隆成淨現金仍然高達九億元！
隆成現價0.57元，深潛喺近一年低位，市值只得4.3億元，細奀到殼股咁，而且淨現金又係市值兩倍，直情係超級現金牛。
轉戰醫療有前景
隆成轉攻醫療產品市場，主打輪椅，兼有意發展到氧氣機同病床。啱啱上個月尾，集團旗下隆成啟航，已經攞到出口醫療業務產品所需要許可證，呢瓣業務，可以發力。全球面對人口老化問題，醫療市場潛力龐大，而祖國阿爺搞醫改，疏導公營醫療壓力。據Frost & Sullivan預計，祖國私立醫院病床數量，會由二○一二年58.2萬張，增加到今年一百一十萬張，而私立醫院住院人次，亦會由二○一二年時一千四百萬，增兩倍到四千四百三十萬人次。
咁睇，喺已經派送特別股息前提下，隆成就快派二○一四年成績單，再派甜品可能性比較低，但超多現金就係發展優勢。而隆成退出經營多年嘅瓣數，全力進軍潛力勁厚嘅醫療產品市場，亦啱路數。再講，隆成PB得0.38倍，又有唔錯PB墊底。
場內有股壇長毛之稱嘅David Webb，現時仲揸住隆成超過8%股權。冷灶煲隆成，當上番每股淨現金1.18元，講緊要翻一番，PB仲喺一倍樓下，比起醫療用品行家，吓吓過一倍PB，隆成仲有水位。
錢雋
細價股專家
本欄逢周二、三、五刊出