泛民主派喺人大八．三一框架下，二○一七年特首選舉肯定冇得出閘，但有泛民背景嘅梁班子成員，似乎仲有一線生機。好似運輸及房屋局局長張炳良咁吖，早前畀港大學者陳弘毅點名話可以考慮選特首後，開始畀唔少人落注，佢噚日出席青協直播節目，同二百六十幾位後生仔喺網上對話時，都被年輕人問到，會唔會接受「挑機」選特首？
喺政治圈打滾嘅人，點會唔知，一旦表態，後患無窮？所以張炳良只係笑笑口話，𠵱家只會專心做好局長嘅職務，希望「有能力」做完今屆任期。佢仲話凡係出任問責局長，由就任第一日起，就預咗隨時落台，「如果能夠做足五年，呢個都係上帝嘅祝福嚟」。