現年三十五歲嘅胡杏兒噚日以關愛大使身份出席導盲犬訓練會成立三周年及訓練中心開幕禮。早前佢大方承認同有「港姐殺手」之稱、四十歲獵頭公司老闆Philip Lee拍拖，蜜運中嘅佢心情極靚。
已見家長
心情靚係咪同有拖拍有關？杏兒「哈哈哈」笑咗幾聲之後話：「因為今日做善事，拍拖係開心，叫做不負眾望啦。佢冇點追，認識後發現大家想法好夾。」之前男友Philip已經見過杏兒雙親，兩老亦好滿意，佢亦都話見過男友父母。
至於男友有「港姐殺手」稱呼再先後同港姐李詩韻、華姐張曦雯拍拖，杏兒就話：「佢都好慘，大家都有過去，嗰時亦都未識佢，港姐殺手佢又未有咁犀利，佢為我都承受咗好多壓力。」另外，張曦雯噚日出席活動，問佢如果見到杏兒會唔會尷尬，佢話：「大家見到都好開心，佢哋都好襯，大家都想有歸宿。」
撰文：馮仁昭