地產代理招聘廣告成日大字標題「百萬年薪不是夢」，真係唔係吹水。中原地產啱啱總結二○一四年嘅業績，住宅部全年營業額高達二十八億八千三百萬元，當中有九十八名分行經理嘅營業額過一千萬元。住宅部賺得最多嘅代理叫做林國強，佢係跑馬地分行嘅sales，舊年個人營業額高達一千七百五十萬元，據聞，佢個人可以淨袋超過五百萬元，即係平均月薪超過四十萬元，高過特首梁振英月薪三十七萬一千蚊。聽講林國強舊年斬獲最多並非來自住宅，而係促成筲箕灣工廈東都中心以十四億元成交，佢袋四球。不過各有前因莫羨人，大家今年努力吧。