今年嘅農曆新年比較遲，二月十九日先至係年初一，而財政司司長曾俊華則喺二月二十五日、即係年初七發表新一份財政預算案。初七係人日，唔知鬍鬚曾會唔會為市民送上生日大禮物？但鄉議局為咗鬍鬚曾呢份預算案，破天荒將由來已久喺年初七舉行嘅新春團拜，延遲至廿七日、年初九先舉行，事關當日梁班子去晒立法會聽預算案，試問官員點可以分身去到新春團拜呢？
八方問過鄉議局主席劉皇發，佢直認讓路預算案，首度將鄉議局新春酒會改喺年初九上午十點先舉行，地點不變都係鄉議局石門大樓。佢預告梁振英當日會現身；至於其他司局長相信都會畀面捧場。