金魚缸一向都有唔少消息傳出，有好亦都有壞，就係有呢啲消息，老散一族先可以炒個不亦樂乎，對大股東嚟講，就似乎係好消息受歡迎啲，不過亦有例外，近期恒盛（845）就係好例子。
恒盛最近都有唔少消息，傳大股東走佬，旗下地盤工人無糧出，股價跌完可以再跌，對持有近七成股份的大股東張志熔似乎唔係件好事，不過，噚日公司停牌又再提出私有化，成件事完成唔同晒。
其實公司喺一年前亦曾經提過私有化，當時公司係用協議安排形式私有化，即係需要75%獨立股東贊成，不多於10%獨立股東反對，法院會議出席人數要過半數。首兩項條件，當時恒盛都通過，就係衰喺第三個條件上，準確啲講，係衰喺三個股東手上，當日法院會議出席人數一百二十位，五十八人贊成，六十二人反對。就係咁，間嘢就trade到今日。
以大股東上次私有化溢價幅度約五成作估算，今次私有化作價亦只有1.2元，若以相同基準，以未有傳出大股東走佬前價格計算，私有化作價每股需1.5元，每股足足節省0.3元，以總股本77.93億股，再扣除張志熔持股63.89%計，即節省超過八億元。
李可強