港鐵係咩做嘅？答案梗係膠啦，港鐵出名膠吖嘛。唔好笑費清搞爛Gag，聽埋我解釋先。
話說西港島綫通咗車後，費清途經上環站，上環站變咗唔係終點站，站內加咗多個往堅尼地城方向嘅指示牌。
往堅尼地城方向變右
其中E入閘口，按道理乘客去堅尼地城就應該左轉落月台，而往柴灣方向就右轉，但費清見到指示牌要所有客入閘後都要向右轉，搞到去堅尼地城嘅乘客要兜多個圈，先去到月台。上環站出名大，要乘客行餐飽。
有港鐵員工八畀費清聽，個入閘位原本確係左右分流，但有管理層話，擔心一旦左邊乘客想去右邊，右邊嘅又想去左邊，會好混亂喎。結果逼人行晒右邊，仲封咗左邊已有嘅扶手電梯㖭！
喺香港第一日搭港鐵咩？我哋識字又知規矩，除非……
港鐵為咗迎接西港島綫，翻新過大堂，但𠵱家連指示牌都改唔切。留心睇吓，會發現E入閘口嘅指示牌，用黑色貼紙遮咗原先嘅向左行箭嘴。而港鐵都認咗最近調整過指示方向，話咁樣人流會更加暢順喎。行路呢啲嘢，我哋乘客識條膠咩！
費清
＃要生計，也要生活 ＃毋忘初衷