今天還有人在問公關有冇用，叫人啼笑皆非，夠膽來問Mary的話，實話：「冇㗎，梗係冇用，炒晒佢啦！」一句講晒，有用冇用，當看你識用不識用。真的，公關只會花錢，永冇收入，哪似人家Sales and Marketing，做個成功宣傳大計，營業額直線上升，一大堆數字，證據確鑿，擲地有聲，一個報告做上去，老闆眉開眼笑，花紅少不了，部門申請明年加大預算易如反掌。
大鑼大鼓做宣傳還好些，起碼一段段一版版正面唱好報道交上去，縱不能當飯吃，起碼可以止止咳。最無奈是做防禦性危機處理，即係一早聞到有𤓓味（pro啲講，即係做完機構風險評估，查找出某個營運環節屬高危），於是推行連串措施，希望減低出事時風險，更重要是把危機處理程序一早規劃好，處境A要做乜講乜，處境B又如何如何，幾多個小時內要作初步回應，回應內容大致亦要草擬好，諸如此類。
好了，有一天危機真的來了，因為一切準備就緒，破壞減至極低，最慘是低到老闆feel都feel唔到隻鑊曾經飄過，死喇，點領功呢？行動超級成功，但英雄反而落得無名無份。
這些年來早已習慣，從來只會因處理極大危機，由極壞救翻生才獲發特別花紅，未嘗有老闆因危機未浮現而嘉許你。獵頭更甚，你爆的鑊越大，報道越是鋪天蓋地，越多獵頭找你。現實如此屢試不爽。老友一語中的，佢話老闆呢種反應，叫「唔見棺材唔流眼淚」。識貨嘅老闆，鳳毛麟角呀。
彭瑪莉
mailto:[email protected]