好似阿里巴巴呢啲咁出色的公司，就好似漆黑中的螢火蟲咁，咁鮮明和出眾，無論何時何地都係咁colorful。最新阿里就因為賣假貨問題，和工商局展開連環罵戰。阿里高呼有人「吹黑哨」，工商局嬲起上來，就上載《白皮書》隔空應戰。
說起工商局，有在內地做生意的高管朋友即時無名火起。事關工商局搞的質檢調查，有港商曾「瀨過嘢」，形容這些質檢很多時並非為維護消費者權益，而是類似CCTV一些打假節目咁，有人想挾份報告伸手攞錢。
曾有一間老字號金舖，被工商局指金飾成色不足，公司管理層一聽大驚，點諗都唔明為何會出現如此大紕漏。點知後來金舖發現，工商局的檢測並非把整件金飾熔掉做測試，而是特登只揀某一、兩個焊接位去做test，故才不合格。聞說金行高層心裏有氣，自己拿金飾給數間化驗所檢測，全數過關，和工商局撐到底。結果？咪就係份報告被上載上網，新聞鋪天蓋地，金舖最後只能硬食這一棍。
所以朋友說，今次阿里和工商局之爭，其實就好似一個爛仔想「收陀地」，點知搵着另一個爛仔，仲要係同阿公friend底㖭！最後咪捉蟲囉。但更搞笑嘅係，雙方以為玩下口水戰，點知嗌交嗌出個禍來，忘記爛仔早已勾結「外國勢力」。如今驚動了美國律師團，想收都收唔番，惟有不斷說「白皮書不再是白皮書」。一個字講晒，硬膠囉。
海迪