「三個男人喺廁所搞乜？」呢個問題，係咪令人想入非非呢？如果大家知道，呢三位男主角係自由黨榮譽主席田北俊、主席鍾國斌以及佢哋嘅沙田區議員梁志偉，會唔會更令大家有揭開謎底嘅衝動？登、登、登……凳，田少自行解畫，話佢日前貼咗三男去公廁嘅相，目的係「試吓好唔好用囉！」原來自由黨學建制派政黨玩成功爭取，既然幫沙田王屋區居民爭取到新公廁，索性公諸於世匯報吓。
八方問過有去公廁實地視察嘅鍾國斌，佢話梁志偉早年已經幫嗰區居民爭取呢個公廁，以便公公婆婆朝早耍完太極或者晨運完，有個公廁方便吓。公廁約一年前動土，近日啟用，既然爭取咗咁耐，田少日前就拉隊一齊「幫襯」，佢仲笑笑口話：「梗係有放低咗啲嘢，賀一賀新屎坑開張大吉啦！」