三年多前，患有酗酒嘅孫柏文喺有線電視醉酒出現，好多人只記得，我喺電視上面反應遲緩咁講水泡。早排，都仲有個左膠少女走過來同我講：「你嗰段醉酒片真係好笑！我同我男朋友唔開心時，都會開來睇吓。即刻開心番！」
段片點擊率高，但有幾多人記得嗰集「華爾街速遞」講啲乜？喺黃元山、顧芷筠同我口中嘅水泡又係乜？嗰集其實就係講歐洲國家債務問題。水泡就係講一項叫extend and pretend政策，即係「你還唔到錢？再借啲畀你還住舊債先」嘅政策。
新政府講人話
當年我步上康復之路，靠嘅就係解決到的事就去解決，不能解決的就學懂接受。其中一個要接受的事，就係各國政府已黐Q咗線，向人民推行啲根本會害人政策，例如乜嘢全面存款保障（香港、愛爾蘭），段十億元計貸款（大陸）當中亦包括歐洲嘅extend and pretend。
咁多年我連磅都減埋，心如止水。點知，喺希臘居然傳出多年黑暗中嘅第一線曙光。希臘選舉後新政府嘅財長，早前見歐盟代表。記者會上歐盟代表西裝骨骨，典型技術官員technocrat，授填鴨教育女士嘅靚仔偶像，型格勁似黃元山。希臘新財長呢？被主流媒體恥笑偏激，樣衰衰，呔都唔打，握手時另一隻手插袋，曾多次被批不設實際、譁眾取寵嘅財經blogger。原因係佢由多年前已話：「我哋唔可以再逃避現實，一個資不抵債問題，係唔可以用解決周轉不靈嘅方法去解決。」佢話希臘唔會再接受新貸款去還舊債，亦建議係時候叫晒所有人坐低認真傾。歐盟代表即青根暴現！
歐洲卒之有人講人話啦！雖然，財長講完，一樣唔打呔嘅希臘新總理又話冇咁嘅事，我唔知希臘呢個而家連女醫生都要兼職做性工作嘅國家係咪真係有救。但見到希臘新財長時，感覺就好似第一次去戒酒會，感受到黑暗中第一線曙光，我同自己話：「衷心祝願天祐希臘啊！」
孫柏文
獨立股評人
http://facebook.com/shuen
本欄逢周二刊出