曾經獲網民頒發「最佳辯論員」嘅政制及內地事務局副局長劉江華，憑當日政府與學聯對話上，因為不發一言而技驚四座，劉江華噚日出席工商界政制發展諮議論壇時，被佢「頂頭上司」、政制及內地事務局局長譚志源點名，叫佢負責回應其中一條有關真假普選嘅問題：「畀佢（劉江華）喺大家面前講多啲嘢。」唔少人發出會心微笑。
不過，劉江華喺政治場上打滾咁耐，對呢啲刀光劍影真係司空見慣，即時接招，聽從上司吩咐，回應台下提問。劉江華話，有得投票先至係真普選，冇得投票咩都係假。劉江華全程仲唔止講咗一次㖭，而係講咗兩三次，所以真係好大進步㗎啦，希望佢上司譚志源高抬貴「口」啦。