新世界發展（017）第三代接班人鄭志剛（Adrian）又有新搞作！向來醉心文化藝術嘅佢，唔單止積極發展藝術商場品牌K11，將藝術融入商業，嚟緊三月仲以個人身份幫上海藝術家徐震搞一個名為 「20歲」系列嘅個人畫展。不過，畫展舉辦嘅場地唔係新世界地頭，而係中環PMQ元創方。
今次Adrian係聯同藝術基金經理人周大為，及徐震嘅藝術公司沒頂聯合策劃呢個畫展。
Adrian唔係第一次搞畫展，舊年就喺上海K11搞咗個莫奈畫展，仲係佢親自出馬專程飛去巴黎同莫奈博物館傾番嚟。
今次同佢合作嘅徐震係一位當代藝術家，喺世界各地搞過唔少畫展。是次畫展將會展出喺大家心目中屬於二十歲愛情顏色嘅畫作，展期由三月十日至十八日。