有一萬三千人參加嘅民陣大遊行，除咗有機會畀市民作政治表態，亦係各大政黨籌款機會。泛民主要政黨政團嘅籌款成績噚日出爐，抗爭型嘅社民連成為吸金大贏家，一共籌得20萬，繼續冠絕一眾政黨，黨主席梁國雄同副主席吳文遠嗌到口水都乾埋，有咁好成績，一定覺得抵番晒啦。
負責舉辦大遊行嘅民間人權陣線，召集人陳倩瑩透露，民陣今次遊行都籌到16.7萬，成績唔差㗎。公民黨都籌到16萬喎，可能同佢哋賣埋紀念品有關，但佢哋話呢個籌款數字，未扣除紀念品嘅成本。至於工黨同民主黨，兩個黨都係齋籌款，冇賣嘢，前者籌到6.7萬，後者則籌到5.7萬，雖然唔夠有賣嘢公民黨多，但原來籌款成績已經畀去年元旦遊行稍升。人民力量就話喎，噚晚先有人數錢，成績未知。
要先還律師費
獲捐款最多嘅社民連成績大躍進，由去年元旦大遊行籌得13萬急升至今年嘅20萬。吳文遠話，即係平均每個遊行人士捐咗廿蚊畀社民連，不枉佢同長毛嗌咪嗌到咁辛苦，佢覺得今年遊行人數雖然畀去年元旦少，但捐錢嘅人好踴躍，五百蚊同一千蚊都比去年多，每五、六個遊行人士就有一個捐錢，相當感動。
民陣副召集人陳樹暉向政黨發溫馨提示，話知道唔少黨派都籌到錢，希望部份「債仔」畀番去年七一大遊行嘅「上繳費」，令民陣有資金繼續運作。吳文遠直認社民連仲未向民陣交呢筆「上繳費」，話該黨實在太多官司，通常一籌完錢就要先還錢畀律師，希望盡快還錢畀民陣。
李八方
mailto:[email protected]