噚日港視（1137）開記招宣佈網購正式推出，主席王維基當然出嚟站台造勢，傳媒關心嘅問題離唔開亞視、淘寶假貨、港視收視差等，口才好嘅Ricky一一得體回應，點知俾一條關於網購嘅問題難到。
話說有記者提到「林偉駿先生之前話香港網購難做……」，呢個時候Ricky竟然面有難色，向台下員工問咗句「林偉駿係……」，對方即刻答係759，淡定嘅王維基「哦」咗一聲之後就繼續答問題。
林偉駿咪就係759阿信屋老闆囉，Ricky舊年先至放咗一張佢同林偉駿嘅合照上自己嘅faecbook，市場仲估佢哋會合作搞網購，林偉駿隨後自爆，話Ricky主動邀約佢傾合作，邀請阿信屋加入成為港視網購平台商店之一，林偉駿最終諗住自己搞，但最後搞唔成。如今Ricky不知道林偉駿是誰，唔通真係咁冇記性？