【本報訊】名人經常到不同地方工作，外遊經驗豐富，但不論同行的是朋友抑或情侶，均認同要互相了解才能令旅程愉快。
因《選戰》而人氣急升的王宗堯自認旅行時喜歡購物，同時又注重儀容，「出門口都會姿整，所以我接受同行異性都咁樣」，但最介意同行女伴走兩步即嫌累，「下下話要搭的士，咁樣就好掃興」。
「睇清對方真面目」
拿督千金莊思敏則稱自己去旅行「好hea」，「可以唔化妝唔shopping」，但會負責自己的行李。她承認情侶外遊容易鬧分手，「會睇清楚對方真面目，我最唔鍾意同行男仔唔認得路」。
藝人李思欣表示，與老公范振鋒去旅遊時都由她計劃行程，「佢會挑剔我唔夠好，所以情侶或夫婦去旅行定行程一定要先了解對方嘅生活習慣同需要」，逛商場會先約好會合時間分開行，「有時佢鍾意游水曬太陽，我會瞓晏啲先落去join」，盡量減少磨擦。
旅遊作家項明生認為女伴花時間化妝只因着緊自己，「換轉係個唔識嘅，佢先唔會care」。他認為旅行中有不滿可選對方心情好時提出來討論解決，宜與伴侶加深了解後方進行長途旅行。
■記者王麗春