今年四月份嘅春季日劇開始曝光，最矚目嘅當然係《半澤直樹》男主角堺雅人夥拍強勁班底炮製日本NTV台的《Dr.倫太郎》。而噚日富士台亦宣佈四月黃金檔「月九」劇場，係由尊尼組合嵐成員相葉雅紀主演嘅《歡迎來到我們家》，相葉即刻俾人話佢以卵擊石。
相葉嘅新劇都係改編《半澤》作者池井戶潤嘅另一本作品，池井戶嘅作品次次改編做劇集都有好成績，不過，相葉就唔被睇好，因為佢往績麻麻，上次擔正已經係兩年前嘅《Last Hope》，平均收視只有10.6%，大結局仲得單位數。
今次相葉第一次擔正做「月九」，撞正同季有堺雅人，網民都大潑冷水話佢演技唔得又係收視毒藥，所以仆硬！而相葉嘅角色咁啱被指係池井戶小說中最弱男主角，俾人話佢現實亦一樣。
而木村拓哉早前都盛傳話春季會有新劇推出，但噚日有人估計會延至七月先至播，事關要避開堺雅人。木村都怕咗佢，咁相葉點贏呀？
撰文：李村姑