港大學生會噚日發表聲明，話梁振英有意借港大校監身份宴請校務委員會委員，藉此粉飾太平，又話梁振英早前話身任港大校監，職責唔包括同學生就憲制問題對話，同港大校長馬斐森尊重言論自由相比，明顯「高下立見」，話梁振英「刻毒、無知、冷血、涼薄」。而港大即將喺下周一開始舉行退聯校內公投。○六至○七年度嘅學聯常委、前學聯秘書長李耀基噚日就反駁退聯派「混淆視聽」，話○六主導港大退聯公投嘅人物、大部份都被視為建制派，學聯內部都認為呢場係學界民主派同建制派嘅對決，同呢次唔同，唔明點解退聯派可以相提並論。