【壹週刊】來自新加坡，身兼創作總監、化妝師和形象總監多重身份的Alvin Goh，最近由鰂魚涌搬往炮台山居住。Alvin形容屋內與屋外是兩個世界，「我一離開呢棟大廈，我覺得我去咗另一個世界，出邊是好local，呢區好親民。」入到屋便是他的世界，放滿Alvin及其他設計師的作品，像在藝術館中游走。「今次想整到間屋係好contemporary的museum，有藝術、時裝和文化。」
已入伙一年的單位，最近才粉飾好，Alvin說：「一搬來忙住同濱崎步做演唱會的形象總監，飛咗好多個月，啱啱呢兩三個月好勤力整好成間屋。」
新屋約有一千六百呎，全部白牆，「對我來說是一個挑戰，好似攞張白紙叫你畫一幅畫出來，自己一個諗晒啲顏色、fabric、texture。」
Alvin劃分出客飯廳後，還有空間闢出一角做lounge area。客飯廳用白色燈膽，用來開會、睇書，和歎茶的lounge area用黃光已足夠，分得仔細，「飯廳要光猛啲，所以呢度cool啲，全部黃光太黑孖孖。」
為免單位感覺冷冰冰，家裡每個區域都用不同顏色來襯托，他為藝術展創作的作品，亦可以用來裝飾牆身，Alvin說：「擺喺storage好嘥，不如直情用呢啲做一種設計，假如唔想嘥太多錢，可以買畫，畫有好多color，好多感覺和唔同設計。」這裡的家具擺設也不是件件貴貨，「最緊要用啲啱嘅嘢，擺一兩件特色擺設已成為成個地方的一個highlight。」
單位亦是Alvin的辦公室，「我都想和我工作的團隊可以relax啲，好似自己屋企人咁樣，我亦是一個唔鍾意成日出去嘅人，不如就做一個home office。」但返工放工同一地方，會否無平衡？「初頭有咁諗，但同事返咗屋企，我都諗緊做嘢，我好少會shut down，除非weekend，weekend我真係唔諗嘢。」最近濱崎步搬屋，Alvin又會否幫手設計？「我話可以俾意見，但唔好叫我設計，因為太辛苦了。」反而他有興趣與明星朋友一齊合作設計傢俬，「裝修就唔得，設計傢俬我真係有興趣。」
iPhone版下載： http://goo.gl/1SDaWF
Android版下載： http://goo.gl/xfQS8D
壹週Plus網頁： http://nextplus.nextmedia.com/