大家好關注嘅齊昕，終於「翻生」喇……八方講嘅「翻生」，只係話齊昕嘅facebook同Instagram帳戶啫。
事緣齊昕嘅有線專訪播出後冇耐，就喺fb留言話謝絕一切訪問，大家都懷疑，呢個到底係咪齊昕嘅留言？齊昕係咪被父母封鎖fb「被失蹤」？可能驚粉絲太掛心，齊昕噚日先後喺fb同ig現身，證明自己仲未「被消失」。
齊昕先喺噚日凌晨兩點幾首先重奪ig「主權」，po咗着住黃色外套嘅自拍相，留言：「Rare night out!!!Happrrriiiii」，其後又貼多張紮辮selfie，寫道：「finally mastered the art of the #SidePlait」及至噚日朝早，齊昕嘅fb亦「重新啟用」，佢po咗張鬼馬姿勢單人照，留言：「Be yourself」，唔通係想講，無論爸媽幾唔like，都堅持我行我素做番自己？
其實噚日都有傳媒向特首梁振英問及，齊昕係咪被消失、以及佢個fb係咪被盜用？梁特只回應：「冇啲咁嘅事！」