公民黨湯家驊提出絕地讓步方案、表明中央若二○二○年取消功能組別,可以考慮袋住先,仲批評泛民主派無政治智慧,將自己逼去牆角。噚日民主黨主席劉慧卿訪問湯狀黨友、法律界代表郭榮鏗Dennis,問Dennis點睇黨友呢番意見?Dennis笑笑口話:「謙卑唔係湯家驊嘅強項。」話完黨友,Dennis都自嘆係「儍仔」,事關自己甚至去埋上海、深圳,爭取中央讓步,但人大八.三一落閘,等於「無得傾」。
身為首個被中聯辦發出新春酒會邀請嘅泛民立法會議員,Dennis重申,聽日出席酒會時,會向在場西環官員交信,向人大委員長張德江表明內地國安法不可以引入香港。佢亦話公民黨支持白鴿黨何俊仁擬辭職公投,但佢認為應該喺方案表決前進行,若然泛民補選輸咗,唔可以輸打贏要,屆時要投票支持方案,「做得又點可以唔尊重民意,否則點叫公投?」