跑咗半季，雷神已經拋離晒所有對手，今屆奪冠在望。佢唔單止係前領騎師，仲係名副其實之騎師王，呢日佢以「精彩鬥士」食尾糊中三元(另外兩win是「環保之星」、「甜城效應」)，累積連勝七次賽事，頭馬升到64場，領先第二位之潘頓21win，更加連續五次日賽勝出騎師王，次次買十蚊都有錢贏。
蘇偉賢馬房的「精彩鬥士」上仗初出第五，巫斯義早段及半條直路冇認真騎過，結果被裁定未盡全力，小組重罰他停賽15個賽日，目前正待本月13日進行上訴聆訊。呢日此駒第二次在港上陣增程跑千六米，易配雷神冇面畀，明落阿巫面都要幫「精彩鬥士」贏馬，事關此駒報咗今年打吡，爭分出線要緊。
結果「精彩鬥士」末段擺正軚即展示驚人潛力，外叠衝贏沿途貼欄前置之1.9倍大熱門「詠彩繽紛」，取得來港後首捷，後駒首戰二班及初跑千六米，功敗垂成只得第二，之前三戰全勝的牠，第四次出賽首嘗敗績，三、四名分別係「天笑」同「智者」，全場最熱四駒包辦前四名，四重彩僅派1,313元，係呢日最低紀錄。