陳倩揚第二個囝囝陳羲穎喺上個月出生，前晚佢哋喺屋企會所擺滿月酒，周圍都有氣球佈置到好靚，仲有個好得意嘅馬仔蛋糕，見細仔羲穎眼仔睩睩肥嘟嘟，非常可愛。倩揚噚日貼咗幾張滿月酒嘅相上微博同大家分享，佢接受電話訪問話：「啱啱好三十日，擺咗滿月酒，因為ＢＢ仲細，天氣又凍，唔適宜周圍去，所以喺屋企會所搞就算，兩家人一齊食飯，現場佈置到好靚，大仔同表弟玩得好開心，好溫馨，諗住百日宴嗰陣再請埋其他朋友一齊食飯慶祝。」
兩星期後復工
倩揚又話囝囝個名都係幾日前至改好，大仔叫羲廷，加上老公鍾意個羲字，所以用番羲字改名，希望囝囝聰明有成就。見到倩揚收身成功，佢笑話：「只係遮住啲仲未收到嘅地方，都未開始減肥，坐月嗰時飲得湯水多又食得多，不過我好貪靚，一定唔會俾自己太肥，餵人奶其實會慢慢瘦，生咗第二胎有經驗，只要食得清淡啲少鹽少油就唔怕，我兩個星期後就復工。」
撰文：馮仁昭
