由「少年股神」變「燈神」嘅火燎森報料話，佢一位朋友日前喺日本大阪一蘭拉麵店撞見內地女星趙薇。火燎森點解關注趙薇？咪就係因為佢喺每股兩個幾買入阿里影業（1060），坐艇中，忟憎佢朋友點解見到趙薇都唔問對方為乜入股阿里影業囉。
趙薇同老公黃有龍舊年十二月斥資近三十一億元買入阿里影業9%股權，成為第二大股東，因而由娛樂版跳到財經版，股民當然關注趙薇點樣同阿里巴巴創辦人馬雲合作喇。
可惜趙薇嗰日以趕住食麵為由，只係願意笑笑口畀火燎森嘅朋友影張相，合照就免嘞，想問多句都冇可能。火燎森只能一臉無奈，原來佢都係阿里影業嘅艇戶，舊年馬雲入股，佢斥資過百萬元，平均價兩個幾掃貨，阿里影業上周五收報1.54元，賬面大約唔見一半，果然好燈。