突尼西亞班球員前晚踢完場非國盃八強戰之後個個變晒獅子，追住個球證係咁咬。點解會咁？之唔係呢個球證吹咗個問題十二碼畀主辦國赤道幾內亞，搞到突尼西亞喺完場前一刻被追和1:1，仲要喺加時輸埋1:2出局。
赤道加時贏2:1入四強
陣中有港超球隊標準流浪球員艾雲壓陣嘅赤道幾內亞，喺上個禮拜六，同突尼西亞爭一張四強入場券。半場雙方踢成0:0，去到七十分鐘終於有入波，阿密特阿卡慈後腳射入，幫突尼西亞領先1:0。去到將近完場，突尼西亞仲係領先，以為入硬四強，點知球證施祖安，喺九十三分鐘指馬路菲禁區內踢跌主隊後備前鋒保拿度而吹罰十二碼，但睇番慢鏡保拿度好似係自己跌。結果查維亞巴保亞為赤道幾內亞追成1:1，賽事進入加時。
加時去到一百零二分鐘，查維亞巴保亞再射入靚罰球，幫赤道幾內亞反超前2:1。最終赤道幾內亞仲保住勝果至完場，創歷史首次晉身四強。突尼西亞俾球證搞一搞，結果由出線變出局，佢哋班球員梗係火滾啦，即刻搵施祖安算賬。好彩在場嘅保安醒目，嗱嗱聲築起人牆，之後連防暴警察都出埋嚟護送施祖安入球員通道。咪以為咁就完，主隊球迷向突尼西亞球員掟嘢，有球員忍唔住還拖，拎起水樽掟上觀眾席，好彩冇人見紅。
突尼西亞教練利根斯賽後狂插球證施祖安：「我喺球壇打滾咗三十年，經歷過好多嘢，但就接受唔到球證有咁嘅決定。簡直係恥辱，完全唔公平。」但赤道幾內亞教練碧加就唔同意：「無論喺最後一分鐘定係任何一分鐘，呢球都係十二碼。」
門將奇特慶祝最爆趣
同日另一場八強戰，剛果民主共和國落後0:2之下，戲劇性喺完場前二十四分鐘連追四球，反勝剛果4:2晉級，佢哋門將基迪亞巴仲用一個好特別嘅方法慶祝，就係「屁股跳」，唔知佢咁樣慶祝完之後，屁股會唔會好痛呢？
識睇，一定係睇足英台【英波Live】：
http://soccer.appledaily.com
http://bit.ly/engballlive