《蘋果》上周四報道前星級分析員陸東（Andrew）打算賣盤。但當事人否認了。打滾多年的江湖朋友挑通眼眉，一睇知「賣盤」是體面的說法，就好似我Noel又點會話自己嫁唔出，唔嫁就一定係我眼角高，right？
又咁講，Andrew呢單新聞令人震驚並不在於賣盤與否，只是基金規模由高峯期三億四千萬元縮到得番唔夠一億元，有傳媒捧佢做「星級基金經理」時，究竟有冇查過基金資產值有幾多？陸羽打躉嘅茶客身家過一億元都大把啦。（公道講句，一億元只係計佢隻旗艦基金，陸東間公司仲有幫客戶度身訂造的投資組合，但金額幾大就無公開。）
我身邊幾個喺中環返工嘅所謂金融界才俊，睇完單新聞都萌生兔死狐悲的感覺。大行分析員F是其中一個，佢細細個就當陸東做偶像。當佢睇完高登仔笑陸東個盤得番一億銀，就嘆息：「班細路唔知搵錢艱難！」我忍不住反擊：「都係陸生被捧得太高之過！落差咁大，唔怪人笑。」F說：「所以我一直唔會做訪問。」真是傳媒害死陸東嗎？名氣向來是雙刃刀，識得用都要識得避。不過有搵夠上岸嘅前輩就覺得，始終英雄難過「ego」關，出入開外資投行，又長期被鎂光燈照住，要放低身段打天下，當中的能屈能伸唔係咁簡單。中環精英若果未練成縮骨功的話，靠名氣搵食前，最好三思。
何淑茵
mailto:[email protected]