唔少公營機構阿頭同政府諮詢委員會主席今年要換人，除咗外界比較關注嘅青年事務委員會陳振彬卸任後主席一職花落誰家，查實關乎打工仔權益嘅強積金管理局，主席一職都要換馬。花生友聽聞，胡紅玉做埋三月後，唔會再獲政府任命做主席；邊個接班呢？暫時嚟講以身兼立法會內務委員會主席嘅經民聯主席梁君彥係大熱。
梁君彥接班大熱
多得基本法委員會委員陳弘毅早前點名可以出閘選特首，令包括胡紅玉在內嘅三名有泛民背景嘅梁班子中人再受注目。但原來胡紅玉喺梁班子嘅公職，即將又再減少一個，因為梁班子唔再搵佢做強積金管理局主席。
花生友睇番資料，發現胡紅玉喺二○○九年獲任強積金管理局主席，如果嚴按政府嘅「六六原則」，胡紅玉做夠六年，確實夠鐘走人，據聞政府都係以呢個理由等佢光榮卸任。但唔少政圈花生友就懷疑，今次叮走胡紅玉，會唔會同政治立場有關？因為胡紅玉比較同情雨傘運動嘅學生，梁振英可能睇唔順眼，肯定唔會用酌情權畀佢延任啦！
胡紅玉一走，邊個接班呢？據聞大熱係梁君彥，因為佢喺管理局內嘅資歷較深，接任都順理成章。大家又唔好忘記喎，梁君彥係經民聯主席，而經民聯保皇程度同民建聯不相伯仲，試問又點會唔獲政府照應？梁君彥出身商界，唔知喺僱主同僱員權益之間，係咪都可以攞到平衡？
花生友