二○一五年開壞頭，睇新聞就感覺天下大亂，這邊廂各國爭相減息怕蝕底，搞到滙市奇chok，那邊廂獵頭族磨刀霍霍，視人命如草芥，令人不安。睇格局今年真係危機四伏，星火隨時可以燎原，操盤見唔對路要果斷斬纜，盲拖無意思。
以上月為例，市場幾單大嘢，先有瑞郎突然減息兼脫歐，及至歐洲央行落實QE，都推動各國踩油減息，連前月狂加息挽狂瀾的俄羅斯，上周五亦投降掉頭減息兩厘保經濟，令期內減息央行數目，兩隻手都數唔晒。美元升勢已持續逾半年，近期單邊市更極端，歐元、瑞郎、澳紐加幣上月均跌逾5%，鐘擺效應遲早出現，尤其是美國上周五公佈的GDP走樣，加上強美元對美企造成的滙兌損失逐漸浮面，沽非美慎防「落」極生悲。
澳洲減息壓力增
回顧上周，美滙指數話就話連升七周，但已近乎原地踏步，當中壞消息盡出的歐元已擺脫六周跌勢，日圓微彈，但商品貨幣仍一團糟。加拿大央行前周爆冷減息，加上GDP出乎意料收縮，拖累加元跌至1.28兌1美元的五年半新低。油價上周五反彈逾8%，理論上雖有助減輕加元沽壓，但經濟滑波增加央行再減息壓力，加元恐怕仍要下試1.3算。
繼加拿大減息後新西蘭央行上周亦撒回加息立場，拖累紐元上周跌2.5%，料下個輪到澳洲。若澳洲央行本周議息後放風減息，澳元難守77美仙支持位，恐現新一輪跌勢。
奇兵
本欄逢周一刊出