曾經同梁振英競爭，選過特首的唐英年，塞翁失馬焉知非福，現時樂得逍遙，可以重拾興趣做馬主。今期賽事(1日)唐唐就重出江湖，有匹新寵「回眸一笑」首次出賽，佢曾經養過唔少馬，2000年「大殺手」係一級賽主席獎盟主，之後「富士晨曦」贏過7win，而最近一次拉頭馬，已經係2009年2月嘅「心福」。
唐唐約4年前同前政務司長許仕仁聯名養過「知己知彼」，「回眸一笑」係唐唐特首選舉敗後首匹愛駒，隻馬英文名叫「No Regrets」（無遺憾），似乎若有所指。不過唐唐回歸馬圈頭炮唔易打響，「回眸一笑」睇血統係慢熱遲熟馬，多次試閘一啲速度都冇，進度似乎麻麻，三歲馬初出跑千四米唔易突圍。
記得唐唐當年選特首曾鬧出緋聞致民望下跌，今次「回眸一笑」亦大有可能輸畀女性。話說同場「常妙星」嘅女馬主朱明雅旺到爆，佢老公葉克勇嘅「新妙星」剛剛成功連捷，當晚朱明雅黑絲風騷到場拉頭馬，而「常妙星」亦都新勝猶勇，上仗一條直路從包尾位置連追十多匹對手勝出，表現大有進步，亞軍「飛霹靂」再出亦補中贏馬，可見水準高，今次「常妙星」抽個黃金1檔，睇怕唐唐要俯首稱臣了。