因了解而分手，係情場上一句廢話，分手總有一千個理由，毋須搵個大家易落台啲嘅藉口。球場簡單啲，每年一月份見證悲歡離合，其實真係幾唔閒，不過呢，球員散水都係有高手同低手之分喎。
最低手者，固然係由未分手到真係割蓆，都不斷以受害者身份出現，「對方唔重視我/呃我/浪費我青春」 成日掛響口邊，佢自己當然係冇錯嘅/係無辜嘅/係聖人嚟嘅。但通常呢班受害者好似命中注定俾人蝦，冇耐之後佢又會出現響其他家庭慘劇之中，直到永遠。
另一種係無聲無息散咗水，有朝返工發現角落有個位少咗個熟識嘅身影，冇咗個同事箒，其實唔會太傷心，但自己愛隊突然唔見咗件，有日上網見到佢着咗一件陌生嘅球衣，握住一位唔熟識嘅光頭佬嘅手，兼擺出一副我得咗嘞嘅成功樣，好似以前隊波待薄咗佢咁就冇癮啦。韋菲特邦尼呢位前史雲斯球員就係人辦，嗰頭話去一去踢非洲盃好快返，呢頭已經着住曼城波衫去飲tea嘞。作為前度，你想扮大方祝福佢，但你知其實講唔出，心底仲暗中咒佢：睇你好得幾耐！不過諗番佢以前同你隊波纏綿過嘅好日子，你又唔忍心，最後都係delete佢嘅account就算數，順便睇吓有咩新仔available先！
睇戲，分手有人會擺酒，現實球場上亦有球員人間有情嘅，謝老四季尾擺幾圍餞別宴、踢幾場告別賽就固然係難免亦冇幾可，你冇半世情兼勞苦功高嘅修為唔使諗，但查實好來好去嘅例子仍然係有嘅，例如伊度奧呢位球場浪人，啱啱離開拖肥遠走森多利亞，估唔到佢粒聲唔出走咗之後，竟然響網上寫番段感謝愛華頓嘅留言，感人程度拍得住啱啱落山嘅郭建邦，咁呀幫主話晒十幾年感情吖，得幾個月貨仔嘅伊度奧有冇咁大感觸呢，唔好理，聽者有feel就得，起碼佢封辭職信唔係上網copy and paste啦！
即將加盟車仔嘅古達度（紅圈），有日返到費倫天拿嘅話亦一定受到英雄式歡迎，你睇佢臨走仲記得同多年隊友影番張大合照就知佢人緣幾好，就好似有間車房請咗個高材生，知留唔得耐㗎嘞，但難得你臨走都會專登買盒散水餅請大家食吓，唔係一有好路數就唔識人咁款，咁同事先有機會講句例牌嘅江湖再見嘛，真心假意都好啦！
KEYMAN
節目主持
電郵：[email protected]