唞咗成個月，德甲喺上星期五歇完冬重開，估唔到第一場波就爆冷。喺上半季德甲保持不敗嘅榜首拜仁慕尼黑，作客排第二嘅禾夫斯堡竟然慘敗1:4。拜仁半程聯賽加埋都只係失四球，估唔到下半季第一場波就已經失夠四球。
禾堡小將馬蘭達艾積喺歇冬期間不幸車禍身亡，兩隊喺賽前列隊悼念。二○一五年第一場德甲，禾堡喺主場技術性擊倒拜仁，前鋒巴斯杜斯喺上半場梅開二度，到下半場就輪到比利時翼鋒奇雲迪布尼發威入兩粒，拜仁方面就只係靠祖安巴尼特破蛋，慘敗收場，亦係佢哋六年嚟最大德甲敗仗；主帥哥迪奧拿賽後都話拜仁表現差抵輸。雖然輸波，拜仁喺榜首都依然有八分領先優勢。至於喺歇冬期間加盟嘅中國中場張稀哲，今場波後備都冇份。
識睇，一定係睇足英台【英波Live】：
http://soccer.appledaily.com
http://bit.ly/engballlive