鄧愛嘉（Victoria）有一個國際級的名爸爸鄧永鏘，除了父女關係，亦是老闆與下屬的關係，為他投資的生活店任創意總監，同時有着守業與創業的使命。Victoria坦言雙重角色不易做，更加不會混淆角色，要做足功課及理據，才能有機會KO見識廣博的「老闆」，獲到一句Thank You已經十分難得。
採訪：梁錦雯
鄧永鏘的長女，現年二十七歲的鄧愛嘉（Victoria），上年十一月底下嫁英國律師Christopher Owen，成為Mrs. Owen後，依然是工作狂一名，為父親投資的生活家品店「鄧鄧鄧鄧」做創作總監，連度蜜月都未有時間去，她表示：「我哋係設計家品，好多時都要靠觀察能力、要market research，keep住諗靈感，放工返到屋企都係諗緊，真係唔識停。」
Victoria大學時期在英國Central St.Martins讀平面設計及攝影，畢業後做過攝影師，現在選擇幫父親打理生意，當然要面對父親與女兒、老闆與下屬的角色扮演：「好多人話幫屋企人手會好大壓力，我覺得我嘅壓力係自己，要設計新奇刺激嘅嘢唔容易。我同得爹哋做嘢，當然唔可以懶，更要提醒自己唔好混淆角色，我唔係承繼一個企業，而係發展一間新起步嘅生活店。爹哋當然係一個好老闆，佢公司好多員工都幫佢打咗好多年工，不過佢係一個有要求，見識好多嘢嘅老闆，要佢buy我哋設計，要做足research、要有數據同佢爭論，先有機會KO佢，做得好佢都未必會讚，一句Thank You已知佢係滿意。」
自細睇周星馳大
於中西文化家庭養份長大的Victoria，談吐有着她父親的幽默感：「我細個會睇周星馳電影，我媽咪成日講好多中文歇後語爛gag，而Lucy（鄧愛嘉後母）學中文時好多唔鹹唔淡嘅拼音笑料。我搬返香港，發現廣東話係好多幽默元素，你哋睇吓『姣斯躉篤』呢個形容詞，真係廣東話先有，我都諗唔到用咩英文嚟形容得到。」國際化的成長環境做就了Victoria的創作點子：「我哋係想做有global taste嘅生活家品，唔係一件得啖笑嘅souvenir，我哋設計有quality同功能性，好似我睇過一本講日本useless invention題材嘅書，入面係設計好周星馳式嘅無厘頭設計，但係喺入面睇到佢哋細心思維。」
嘉玲姬蒂靈感女神
父親鄧永鏘是國際級名人，此店更是與劉嘉玲合夥開設，開幕時更邀得英國超模好友姬蒂摩絲（Kate Moss）東來剪綵。Victoria認為此兩位成功女強人給了她不少靈感：「好佩服嘉玲姐嘅生意頭腦同魄力，佢會畀靈感我哋，好似佢提議我哋設計夾住餐巾嘅夾，又可以變成夾圍巾。」姬蒂在開幕時一口氣買了十七個化妝wash bag，她表示：「當然希望會同佢有設計合作嘅機會，名人當然幫到個品牌，但係生意還生意，朋友還朋友。」
過癮家品琳瑯滿目
「鄧鄧鄧鄧」中，林林總總生活家品達幾百件，當中由百多元的浴簾到四萬多元柬埔寨蓮莖為衣料的外套，亦有估你唔到的間諜錄音筆、方形電飯煲等設計。眾設計中，更不乏夾雜着廣東話食字、英式幽默、中國元素等靈感。如以牆、眼睛及膝蓋圖案的袖口鈕，以英文Wall-Eye-Knee解作「我愛你」普通話讀音，繡上DO NOT DISTURB的睡衣、中國生肖圖案的絲質睡衣切合流年運程，充滿會心微笑的中西文化幽默感。
