【樓市狂潮】
香港樓價被嘲諷貴絕全宇宙，繼粉嶺鄰近和合山墳場的公屋華明邨呎價賣過萬後，大角嘴個間「無房」（開放式）居屋，只得二百多方呎，居然賣過三百萬元，呎價逾一萬四千元，誕下全港史上呎價最貴居屋王，一個月搶貴近7%，媲美同區私樓。記者直擊新居屋王，廳不足八十呎，而單是廁所已值近半百萬元。
記者：朱連峰
樓價高企，首期有限的小市民不但越住越細，最近全城洶湧搶購超細戶，升幅分分鐘勁過豪宅。西九龍近年有多個豪宅落成，呎價動輒兩至三萬元，區內居屋也水漲船高。鄰近港鐵奧運站的大角嘴海富苑，再創全港居屋紀錄，開放式無房單位首破「三球」。
屋苑個多月搶高7%
家天下黎振傑表示，海富苑海寧閣中層十室，實用面積二百一十三方呎，上周五晚連地價以三百零九萬五千元易手，呎價高達一萬四千五百三十一元，較屋苑去年十二月中造出的一萬三千五百八十五元舊紀錄，短短個多月再高近7%，成為全港居屋呎價史上最癲，並媲美區內私樓價。中原數據顯示，其中凱帆軒及浪澄灣，現平均呎價一萬四千零四十七及一萬四千六百三十九元，遠少少的港灣豪庭，均價也只是一萬三千八百零一元。他指同類似單位零放盤，若轉作出租可達九千元，以購入價計回報率三點五厘。業主兩年賬面賺百萬元（購入價一百九十二萬元）。
記者昨直擊居屋王，雖然屋仔細細，但有獨立廁所和廚房，廚房還相當大，約有四十呎，部份新盤睡房也只有三十多方呎；廁所也有約三十一方呎，有坐廁和企缸，以單位呎價逾一萬四千元計算，廁所已值約四十五萬元，相當驚人。叫得開放式，意思是全屋冇房，簡單而言是得個廳，「瞓同食都要喺個廳」。記者現場度尺，個廳得七十三呎左右，長約十二呎，闊不足七呎，身高約五呎六吋的記者打橫瞓低，伸直剛好兩邊貼牆。雖然個廳只有幾十呎，勝在四正實用，一個人住絕對足夠有餘。此外，單位如此細小也附設玄關位，佔去單位約十二呎。
街坊慨嘆樓市瘋癲
同層街坊聽見天價成交都嘩一聲，不敢相信是事實。宋伯伯在二○○八年僅以一百零五萬元綠表價購入同層一單位，如今單位已升值至約三百五十萬元，被記者問到會否帶挈他發達，他顯得十分激動地說，「發達踎街咩，你畀（每呎）兩萬蚊我都唔會賣呀，賣咗瞓街呀，係咪！自住嘛，升值得個數字有鬼用。」記者問他覺不覺現在樓市很癲，他指「梗係癲啦，癲到不得了呀」。
【鄰居心聲】
唔信高價
對於天價居屋的交易，同層戶業主李太隔住鐵閘呆幾秒回應話「唔會啩，冇咁多呀」，完全不信居屋可以賣這個價。
堅拒放賣
天價居屋鄰戶的宋伯伯指「你畀兩萬蚊我都唔會賣呀，賣咗瞓街呀。」他又指，其女兒早幾年以二百萬元購入同區港灣豪庭單位，揸冇耐二百八十萬賣咗，但之後樓市升到嘭嘭聲，好後悔。
