【童夢傳真機（三之二）兒歌篇】就算忘記那任你躺的水邊青青小草？都應該記起隨時施法術的烏卒卒和雙腿好似摩打的足球小將吧？陪着我們成長的兒歌，是卡通片的報時訊號，也是我們的道德寶鑑。是它鼓勵我們要遊玩中長心智，才能一飛衝天；是它教曉我們敢發問勇敢去尋，再為難也有辦法；是它令我們相信人間仙樂處處飄。只可惜，在兒歌不再重視的年代，下一代的價值觀，莫非要從國民教育裏灌輸？或者，我們可以做的，就是從這些兒歌主唱者林子祥、陳松伶、湯寶如和王馨平，緬懷一下往日的好罷了。
撰文：盧妹、卓寶花、戴彩煥
林子祥 飛逝的穿梭機
曾幾何時，放學回家第一時間亮着的，並非平板電腦，而是那個還是很厚重的大牛龜電視。下午四時三十分，「一飛衝天去，一飛衝天去，小小穿梭機！」電視傳來林子祥（阿Lam）的歌聲。
阿Lam的兒歌產量不多，但最經典的《穿梭機》唱到今時今日依然琅琅上口，其他作品還有《虎威戰士》、《心肝寶貝》及《有智慧不要浪費》等。阿Lam記得首次被邀唱兒歌「有啲開心」，他說：「可能我唱得廣告歌多，覺得我搞笑就搵我，我鍾意㗎，覺得可以玩嘢。唱兒歌同唱流行曲唔同，配咗卡通聲，未必要用晒真聲去唱，有時都要唱高幾度，好似阿梅（梅艷芳）唱《IQ博士》咁。」
《心肝寶貝》送仔女
雖然《穿梭機》家喻戶曉，但從未收錄在阿Lam的大碟內，原因何在？阿Lam說：「可能電視台啩，唔知點解，成日都喺電視度播，冇需要啦。」小朋友粉絲數量可有激增？阿Lam笑謂：「肯定啦，小朋友啲爸爸媽媽認得我，會叫小朋友喺街唱幾句畀我聽。」至於其他兒歌，阿Lam最記得當然是為仔女林德信及林德懿寫的《心肝寶貝》：「當時喺演唱會唱呢首歌，咁啱劉天蘭生咗個女，幫我做和音嘅堂妹生個女，我又有兩個，唱嗰陣感覺好特別。」
懷念拍檔路家敏
至於經典的兒童節目主持，阿Lam說：「譚玉瑛姐姐，仲有路家敏，佢同我合唱過《有智慧不要浪費》，歌詞就太耐唔記得，不過係叫人做好功課，唔好浪費光陰。我同路家敏拍過兒童節目，佢好叻女，乜都識做。」
對於近日兒童節目大改革，象徵一個時代的結束，阿Lam坦言：「𠵱家嘅人教細路，唔需要睇電視，個個有自己個手機，我外孫女已經識得拎住自己篤，邊個仲有時間坐定定睇電視？」